Las emprimas elecziuns libras en Indonesia. L?emprima presidenta da la Confederaziun. La schliaziun dal scumond da partidas en Tadschikistan. Na pareva l?onn 1999 betg da marcar in resvegl, na devi betg speranza per in meglier avegnir? Il nov millenni tementava dentant spert questa speranza.
Ina cuntinuitad da speranza e da collavuraziun sur ils cunfins linguistics e naziunals ora devi però tuttina: il festival Xong. En la regiun da cunfin dals trais pajais Italia, Austria e Svizra è quel sa deditgà a las tradiziuns culturalas senza las instrumentalisar. In festival cun la finamira da surventscher cunfins; cunfins linguistics e cunfins naziunals ma er ils cunfins da las atgnas experientschas. Ussa però va a fin questa cuntinuitad. L?onn 2010 ha il festival lieu per l?ultima giada.
In motiv per esser trists? Sa chapescha ch?igl n?è betg stà pussibel da schliar ils gronds conflicts durant il festival. I na vegniva er betg fatga politica mundiala ? ma tuttina politica internaziunala. E, auter che uschiglio en la politica, era la cultura decisiva. E quai ha bain caracter da model che na dastga betg ir a perder!
Cun la grondiusa idea da render perceptibla la cultura sur ils cunfins ora ha il festival stgaffì er insatge concret: Xong ha procurà per experientschas. Grazia al festival han bleras persunas pudì reflectar ensemen, tadlar tuns esters e scuvrir cun mintga sguard insatge nov u istoric. La bilantscha dal festival Xong n?è perquai er betg en emprima lingia da chattar sin palpiri u en in rendaquint, mabain en il cor ed en l?olma. E sch?il festival ha lieu ussa per l?ultima giada, sche èsi ? malgrà tut la tristezza ? l?emprim da tut d?engraziar ils responsabels. Per lur lung engaschament a favur da la cultura e da la chapientscha als engraziel jau cordialmain er en il num da la regenza dal chantun Grischun.
Damai, ina giada vegnin nus anc a giudair la multifariadad culturala da trais pajais e da numerus artists ed artistas dals pli differents geners d?art. Ans allegrain pia da vesair quest?ultima ediziun dal festival ed ans prendain a cor l?engaschament dals responsabels. Purtain l?idea dal festival cun nus en l?avegnir!
Claudio Lardi
2010 President da la regenza chantunala
President da la regenza chantunala grischuna
