?SchwanenXONG? - il chant dals cigns sco final
Ils cigns chantan il plü bel cur chi va a fin cun els. Perquai il nom ?SchwanenXONG? per l?ultima ediziun. La fin da lügl 2010 vain dimena organisà quist ultim festival dal XONG illas regiuns da cunfin da l?Italia, l?Austria e la Svizra. Il ?SchwanenXONG? es la 12-avla ediziun dal festival da cultura e musica XONG ed il tema da quist on es ?Spiert liber?.
?Scha la società arcus raetiae less cha?ls umans s?inscuntran eir suroura als cunfins dals pajais, sto gnir sport alch chi tils metta in movimaint.? Cun quista finamira ha cumanzà dal 1999 il XONG.
Dapö pissera il XONG adüna per inscunters sur ils cunfins oura, per evenimaints culturals per giasts ed indigens da tuottas trais regiuns. Tuot s?inscuntra ed ha imprais a predschar eir ils vaschins e lur cuntradas. Cun concerts, cun lavuratoris da musica, da teater e lavuratoris d?uffants, cun spassegiadas culturalas, cun musica illas ustarisas e süls bains da paurs, cun ün vast program chi?d es dimena creschü e s?ha verifichà il decuors dals ons, es adüna restà il böt principal dal XONG quel da promover las regiuns. Las regiuns periferas sun stattas quella cuntrada da cultura ingio chi?s po far cultura ed ingio chi dà üna cultura vivüda chi fa part a la vita. La società arcus raetiae ha perque eir adüna vis sia lavur da cultura sco investiziun i?l avegnir e sco contribuziun per ün svilup perdüraivel da las trais regiuns da cunfin. XONG ha savü inchantar dürant tuot ils ultims 11 ons tant a giasts sco eir ad indigens ed ha perfin pisserà cha la glieud ha fuormà daplü conscienza invers las aignas valuors.
I nu stà in discussiun cha?l XONG es da gronda valur per las trais regiuns. Quai cumprova eir üna studia da la scoula ota da Puntina chi ha chattà oura cha be dürant l?eivna dal festival svess, maina quel üna plüvalur directa o indirecta per tuottas trais regiuns insembel chi s?amunta a ruduond 1,5 milliuns Euros. Ils commembers da la società arcus raetiae rivan però a lur limits. Els nu sun plü buns da praistar tuot la lavur d?organisaziun in uffizi onurari e sperapro eir amo portar la respunsabiltà finanziala per ün festival da tala dimensiun. Davo avair valütà quists fats ha la radunanza da la società decis cha?l festival da quist on dess esser l?ultim.
